WhatsApp API: 1 қазаннан айына 1 000-нан асқан жауаптар ақылы, Қазақстанда — $0,018
Meta 24 сағаттық терезедегі сервистік хабарламалар мен utility жауаптары үшін ақы алады. Нөмірге айына 1 000 хабарлама және Click-to-WhatsApp жарнамасынан кейінгі терезе тегін қалады.
2026 жылғы 1 қазаннан бастап Meta WhatsApp Business Platform-дағы сервистік хабарламалар үшін ақы ала бастайды. Бұлар — бизнестің API арқылы 24 сағаттық қызмет көрсету терезесі ішінде клиентке жіберетін кәдімгі жауаптары. Өзгеріс клиенттермен CRM, чат-бот немесе провайдер панелі арқылы хат алмасатындардың бәріне қатысты. Қазақстанда бір хабарламаның ставкасы $0,018 болады. Әр нөмірге айына алғашқы 1 000 сервистік хабарлама тегін, ал Click-to-WhatsApp жарнамасынан кейінгі 72 сағаттық терезе бұрынғыдай тегін қалады.
Не өзгерді
Meta өзгерістер туралы 2026 жылғы 27 мамырда хабарлап, қазанға арналған ставкаларды 1 қыркүйекте жариялады (толығырақ — өзгерістер сипаттамасында және тарифтер бетінде).
- Сервистік хабарламалар 1 қазаннан бастап шаблондар сияқты әр хабарлама бойынша төленеді. Meta Business Agent жібермеген кез келген шаблонсыз хабарлама сервистік болып саналады — менеджердің немесе бөгде ЖИ-боттың жауабы да осыған жатады. Мұндай хабарламалар 2024 жылғы 1 қарашадан бері тегін болатын.
- Utility хабарламалары: ашық 24 сағаттық терезе ішінде клиентке жауап ретінде жіберілгендері де ақылы болады. 2025 жылғы 1 шілдеден бері олар тегін еді.
- Тегін лимит — әр нөмірге айына 1 000 жеткізілген сервистік хабарлама. Лимит жеке және топтық чаттарға ортақ, келесі айға ауыспайды және ай сайын жаңарады. Көлемге қарай жеңілдік жоқ.
- Қазақстанға арналған ставкалар. Meta Қазақстанды тарифтік кестеде жеке жолға шығарып, utility және authentication ставкалары өсетін нарықтар қатарына қосты. 1 қазаннан бастап жеткізілген бір хабарлама үшін: marketing — $0,0604, utility, authentication және service — әрқайсысы $0,018, жаңа authentication-international ставкасы — $0,16. Қазір, Meta кестелеріне қарағанда, Қазақстан «Other» ставкаларымен есептеледі: онда utility мен authentication — $0,0077. Демек, бұл ставкалар екі еседен астам өседі, ал marketing өзгермейді. Бұл — біздің қорытынды, Meta мұны тікелей жазбайды.
- Жарнамадан кейінгі терезе. Click-to-WhatsApp жарнамасы мен Facebook-тағы әрекетке шақыру батырмаларынан кейінгі 72 сағаттық тегін терезе сақталады. Ол бизнес 24 сағат ішінде жауап берсе ғана ашылады және сол жауаптан бастап 72 сағатқа созылады.
- Meta Business Agent 2026 жылғы 1 тамыздан бері ақылы: 1 млн токен үшін $2. Meta бағалауынша, бір хабарлама әдетте 20–25 мың токен жұмсайды — шамамен 4–5 цент. Бұл хабарламалар 72 сағаттық терезе ішінде де ақылы.
- Төлем әдісі. 25 тамыздағы құжаттамада Meta былай деп жазған: провайдерде немесе тікелей интеграцияланған бизнесте 30 қыркүйекке дейін төлем әдісі болмаса, 1 қазаннан бастап сервистік хабарламалар жеткізілмейді. 10 қыркүйектегі тарифтер бетінде ереже нақтыланды: WhatsApp Business Account-та төлем әдісі болмаса, хабарламалар тегін 1 000 шегінде жеткізіледі, одан асқаны — жоқ.
Бизнес үшін не білдіреді
Ережелер WhatsApp Business Platform үшін, яғни API арқылы жүретін хат алмасу үшін сипатталған. Бұл материалдарда кәдімгі WhatsApp Business қосымшасы аталмайды.
Шағын бизнес жауаптар үшін мүлде төлемеуі мүмкін: айына 1 000 хабарлама — бір нөмірге күніне шамамен 33 хабарлама. Мысалы, бір нөмірден айына 3 000 сервистік хабарлама жіберілсе, оның 2 000-ы ақылы: Meta ставкасы бойынша шамамен $36, оған провайдердің үстеме ақысы (егер болса) қосылады.
Жарнама үшін ең бастысы: клик құны сол күйінде қалса да, лид пен сатылым құны өсуі мүмкін, әсіресе менеджерлер клиентпен ұзақ хат алмасса. Енді жауап жылдамдығы шығынға әсер етеді: Click-to-WhatsApp өтініміне 24 сағат ішінде жауап бермесеңіз, тегін терезе ашылмайды, ал 24 сағаттық терезе жабылған соң клиентке тек ақылы шаблонмен жаза аласыз.
ЖИ — жеке шығын бабы. Бөгде чат-боттың жауаптары сервистік хабарлама болып саналады: лимиттен тыс әрқайсысы $0,018, оған ЖИ-сервистің өз тарифі қосылады. Meta Business Agent бір хабарлама үшін шамамен 4–5 цент тұрады — бұл сервистік ставкадан екі еседен астам қымбат, әрі тегін терезе ішінде де ақылы.
Қазір не істеу керек
- Клиенттермен қалай байланысатыныңызды анықтаңыз: WhatsApp Business қосымшасы арқылы ма, әлде CRM, чат-бот не провайдер арқылы API ме.
- 30 қыркүйекке дейін WhatsApp Business Account-та төлем әдісі — өзіңіздікі немесе провайдердікі — қосылғанына көз жеткізіңіз. Провайдерден жаңа төлемдерді қалай есептейтінін және үстеме ақы қоса ма, соны сұраңыз.
- Әр нөмір айына қанша сервистік хабарлама жіберетінін есептеңіз: 1 000-ға дейін — тегін, одан әрі — әрқайсысы $0,018.
- Бюджетті ескі аймақтық ставкалармен емес, Meta құжаттамасындағы өзекті тарифтік кесте бойынша жоспарлаңыз. WhatsApp Business-тің ашық бағалар беті әзірге 1 қазанға дейін қолданыстағы тәртіпті сипаттайды.
- Сату сценарийін тегін терезеге бейімдеңіз: Click-to-WhatsApp өтінімдеріне алғашқы 24 сағатта жауап беріңіз, ал бағаны, жеткізу шарттарын және жазылу сілтемесін хат алмасуды күндерге созбай, бірден жіберіңіз.
- Лид пен сатылым құнын хабарламаларды ескеріп қайта есептеңіз: Meta Business Agent үшін әр жауапқа шамамен 4–5 цент, бөгде бот үшін лимиттен тыс әр хабарламаға $0,018 және боттың өз тарифі.
- Маркетингтік шаблондарды ($0,0604) күнделікті еске салуларға емес, бұрынғы клиенттерді қайтаруға қалдырыңыз.
Тегін мүмкіндік әлі де аз емес, бірақ енді оны саналы пайдалану керек.